Ветэранаў прафсаюзнага руху ўшаноўвалі ў Гомельскім абласным аб'яднанні прафсаюзаў

Мерапрыемства прайшло ў рамках акцыі "Дзень дабра, павагі і падзякі", прымеркаванай да Дня пажылых людзей.

Напярэдадні свята ва ўтульнай атмасферы сабраліся прадстаўнікі апарата кіравання абласнога аб'яднання і умудроныя вопытам ветэраны, чыя дзейнасць доўга была звязана з прафсаюзамі. Сярод іх Леанід Барабанаў і Анатоль Кабанец, якія працяглы час стаялі ля руля.

Удзельнікі шчыра радаваліся сустрэчы, за чаяваннем размаўлялі, дзяліліся ўспамінамі і вопытам, гаварылі аб дасягненнях. Старшыня абласнога аб'яднання прафсаюзаў Пётр Кірычэнка і намеснік старшыні Жанна Гатальская цёпла павіншавалі калег, падзякавалі за працу, цярпенне і ўклад у развіццё прафсаюзнага руху Гомельшчыны і ўручылі памятныя падарункі. Навучэнцы Гомельскага дзяржаўнага каледжа мастацтваў імя Н. Ф. Сакалоўскага падарылі музычныя віншаванні.

Акрамя таго, у гэты дзень з добрымі справамі кіраўніцтва і прадстаўнікі абласнога аб'яднання прафсаюзаў наведаюць дом-інтэрнат для састарэлых і інвалідаў "Шубіна". Прафсаюзы падораць пастаяльцам установы вулічную альтанку.