Савет па біялагічнай бяспецы пры Саўміне створаны ў Беларусі

Пры Савеце Міністраў створаны Савет па біялагічнай бяспецы. Яго склад зацверджаны пастановай урада нумар 634 ад 28 верасня 2023 года, якая афіцыйна апублікавана на Нацыянальным прававым інтэрнэт-партале, паведамляе БЕЛТА.

Згодна з дакументам узначаліць савет прэм'ер-міністр Раман Галоўчанка. Намеснікамі старшыні савета сталі намеснік прэм'ер-міністра Ігар Петрышэнка і старшыня Віцебскага аблвыканкама Аляксандр Субоцін. У складзе савета таксама міністр сельскай гаспадаркі і харчавання Сяргей Барташ і міністр аховы здароўя Дзмітрый Піневіч.

У савет таксама ўвайшлі дырэктар Інстытута біяфізікі і клетачнай інжынерыі Нацыянальнай акадэміі навук Беларусі Андрэй Ганчароў, дырэктар Рэспубліканскага навукова-практычнага цэнтра эпідэміялогіі і мікрабіялогіі Уладзімір Гарбуноў, намеснік дзяржаўнага сакратара Савета бяспекі Аляксандр Невяроўскі і інш.

Савет па біялагічнай бяспецы пры Савеце Міністраў вызначаны як пастаянна дзеючае фарміраванне ў галіне забеспячэння біялагічнай бяспекі, якое ажыццяўляе каардынацыю праводзімай у Беларусі работы па папярэджанні, выяўленні і зніжэнні біялагічных рызык, звязаных з негатыўным уздзеяннем небяспечных біялагічных фактараў на здароўе чалавека, жывёл, расліны, прадукцыю жывёльнага, расліннага паходжання і (або) навакольнае асяроддзе.

У абноўленай Канцэпцыі нацыянальнай бяспекі праблематыка біялагічнай бяспекі вылучана асобным раздзелам. Як адзначыў 13 верасня ў час нарады ва ўрадзе прэм'ер-міністр Раман Галоўчанка, актуальнасць гэтага пытання з кожным годам толькі ўзрастае. Больш таго, апошняе дзесяцігоддзе назіраецца інтэнсіўнае распаўсюджванне шэрага небяспечных інфекцыйных захворванняў сярод людзей і жывёл. "Гэта і ўспышкі цяжкіх рэспіраторных захворванняў, і пандэмія COVID-19, і панзаотыя афрыканскай чумы свіней, высокапатагеннага грыпу птушак і іншых. Мы бачым, што цяпер адбываюцца ўспышкі, здавалася б, даўно пераможаных хвароб чалавека і жывёл, нарастае праблема распаўсюджвання мікраарганізмаў, устойлівых да лячэння антыбіётыкамі", - растлумачыў тады кіраўнік беларускага ўрада.

Таксама, паводле яго слоў, вельмі вялікія апасенні выклікае дзейнасць асобных дзяржаў па эксперыментах у сферы мікраарганізмаў, біялагічныя лабараторыі незразумелага прызначэння. "Больш таго, мы назіраем актыўнасць шэрага краін, у тым ліку тых, што суседнічаюць з намі, па даследаванні геному чалавека, жывёл, раслін, рабоце з патагеннымі мікраарганізмамі. І не заўсёды гэта мае на мэце стваральны навуковы інтарэс", - абазначыў праблематыку прэм'ер-міністр.