Салодкая, жоўтая, свая: на Тураўшчыне нарыхтоўваюць 35 тысяч слоікаў кансерваванай кукурузы за суткі

Такі аб'ём прадукцыі сыходзіць з канвеера за дзве васьмігадзінныя змены філіяла "Тураўскі кансервавы камбінат" ААТ "Тураўшчына".

Прадпрыемства атрымлівае сыравіну на 130 гектарах, толькі ў Жыткавіцкім раёне наладжаны поўны цыкл вырабу кансерваванай кукурузы ад сяўбы да закаткі – у Беларусі больш няма такіх гаспадарак.

У сезон збор пачаткаў бесперапынны – механізатары працуюць і па начах: кукуруза – культура далікатная, прастояў не любіць. Адразу ж сыравіну вязуць на камбінат, дзе здымаюць лісце, лузаюць. Збожжа аператары адбіраюць толькі самае свежае і жоўтае, паралельна ўжо апарваюцца шкляныя банкі. Прадукт пападае ў тару і адпраўляецца на стэрылізацыю. Далей – у гандлёвыя сеткі па ўсёй краіне.

У гэтым годзе плануюць нарыхтаваць 2,3 мільёна слоікаў кукурузы, гэта аб'ём мінулага года. Заданне ўжо выканалі на 30 працэнтаў. З пакупнікамі праблем не будзе –якасць кансерваў з Турава даўно ацанілі спажыўцы ў Беларусі і іншых краінах. Ужо заключаны дагаворы на пастаўку ў Расійскую Федэрацыю.