Канчатковы варыянт генеральнага плана Гомеля з'явіцца ў 2024 годзе

Дыялогавыя пляцоўкі, падчас якіх можна было азнаёміцца з перспектывай забудовы горада над Сожам, праходзілі на працягу двух тыдняў.

Да грамадскага абмеркавання запрашалі ўсіх жыхароў горада. Кожны мог задаць пытанні і ўдакладніць некаторыя дэталі, якія тычацца стратэгіі горадабудаўнічага развіцця тэрыторыі абласнога цэнтра да 2035 года.

Як распавяла намеснік начальніка ўпраўлення архітэктуры і горадабудаўніцтва Гомельскага гарвыканкама Таццяна Хамутоўская, у новым дакуменце скарэктуюць некаторыя рашэнні шматкватэрнай і жылой забудовы, але вялікіх змен не будзе – зменіцца занаванне тэрыторый і іх прызначэнне. Напрыклад, развіццё горада прадугледжана ў бок Добруша: у перспектыве новыя шматпавярхоўкі з'явяцца ў Бярозках, але актыўная забудова пачнецца толькі пасля будаўніцтва Усходняга абыходу.

На Шведскай Горцы будзе зялёная зона ля помніка археалогіі, і якраз непадалёк, ля возера Ропаўскае, ёсць пляцоўка, якая падыходзіць для аквапарку накшталт "Лябяжага" ў Мінску.

У бліжэйшы час працягнецца знос сядзібнай забудовы вуліц Палескай, Барыкіна, Багдана Хмяльніцкага, Крупскай і ўзвядзенне там шматкватэрных дамоў. Пад грамадскія тэрыторыі рэканструююць свабодныя плошчы ЗІПа, "Камінтэрна", "СтанкаГомеля", хлебазавода па вуліцы Інтэрнацыянальнай.

Прапановы, якія паступілі ад грамадзян, будуць прааналізаваны, разгледжаны і па магчымасці ўнесены ў дакумент. Плануецца, што новы генеральны план Гомеля з'явіцца пасля ўсіх абмеркаванняў, экспертыз і ўзгадненняў у пачатку 2024 года. Яго апублікуюць на партале pravo.by.