Энергетыка Гомельскай вобласцi
У Гомельскай вобласці асноўнымі вытворцамі электрычнай і цеплавой энергіі з'яўляюцца энергакрыніцы рэспубліканскага унітарнага прадпрыемства электраэнергетыкі "Гомельэнерга" (www.gomelenergo.by), раённых арганізацый жыллёва-камунальнай гаспадаркі і КВУП "Гомельаблцепласетка", якія ўваходзяць у галіновае ўпраўленне Дзяржаўнага аб'яднання "Жыллёва-камунальная гаспадарка" Гомельскай вобласці» (ugkh.gomel.by). Найбуйнейшымі энергакрыніцамі РУП "Гомельэнерга" з'яўляюцца: Гомельская ЦЭЦ-2, Мазырская і Светлагорская ЦЭЦ. Акрамя гэтага, вытворчасць энергіі ажыццяўляецца на Гомельскай ЦЭЦ -1, Рэчыцкай міні-ЦЭЦ, Жлобінскай ЦЭЦ і кацельнямі ў г. Гомелі і Рагачове. Сумарная электрычная магутнасць ЦЭЦ складае 972,7 МВт. Асаблівасцю функцыянавання Гомельскай энергасістэмы з'яўляецца эксплуатацыя цеплаэлектрацэнтраляў у найбольш эканамічным камбінаваным рэжыме вытворчасці электрычнай і цеплавой энергіі. У 2022 годзе РУП "Гомельэнерга" забяспечана вытворчасць 6340,9 тыс. Гкал цеплавой і 2607,7 млн. кВт·г электрычнай энергіі. У жыллёва-камунальнай гаспадарцы вытворчасць цеплавой энергіі ажыццяўляецца ад 596 кацельняў, сумарнай магутнасцю 1952,1 МВт. Акрамя гэтага, камбінаваны водпуск электрычнай і цеплавой энергіі выконваецца ад 8 кагенерацыйных установак сумарнай электрычнай магутнасцю 11,9 МВт. У 2022 годзе арганізацыямі жыллёва-камунальнай гаспадаркі выраблена 1529,0 тыс. Гкал цеплавой і 32,0 млн. кВт·г электрычнай энергіі. Асноўным відам паліва ў рэгіёне з'яўляецца прыродны газ, які пастаўляецца з Расіі, рэалізацыяй якога на тэрыторыі Гомельскай вобласці займаецца рэспубліканскае вытворчае унітарнае прадпрыемства "Гомельаблгаз". У 2022 годзе аб'ём рэалізацыі прыроднага газу спажыўцам склаў 2 4376,4 млн. м 3. У мэтах забеспячэння энергабяспекі і павышэння энергетычнай незалежнасці дзяржавы асаблівая ўвага надаецца замяшчэнню імпартуемага газу мясцовымі паліўна-энергетычнымі рэсурсамі, у тым ліку аднаўляльнымі крыніцамі энергіі. У 2022 годзе доля выкарыстання мясцовых відаў паліва ў балансе кацельна-пячнога паліва, уключаючы аднаўляльныя крыніцы энергіі, склала 20,8 працэнта. Для павелічэння паказчыка, у 2022 годзе ў вобласці ўведзена ў эксплуатацыю 3 энергакрыніцы з устаноўкай кацельнага абсталявання, якое працуе на мясцовых відах паліва, агульнай цеплавой магутнасцю 11,5 МВт. Геаграфічнае становішча Гомельскай вобласці дае магчымасць найбольш эфектыўна ўкараняць фотаэлектрычныя станцыі. Цяпер у Гомельскай вобласці функцыянуюць фотаэлектрычныя станцыі сумарнай магутнасцю 98,8 МВт. Асноўны этап уводу ў эксплуатацыю такіх крыніц прыпаў на перыяд з 2014 па 2017 гады, калі, у прыватнасці, была ўведзена ў эксплуатацыю самая буйная ў галіне фотаэлектрастанцыя РУП "ВА "Беларуснафта" ў Рэчыцкім раёне магутнасцю 55,2 МВт, а таксама былі пабудаваны ў 2016-2017 гадах за кошт прыцягнення замежных інвестыцый фотаэлектрастанцыі ў Брагінскім і Ельскім раёнах сумарнай магутнасцю 37 МВт. У 2021 годзе ТАА «ВетраВат плюс» уведзена ў эксплуатацыю фотаэлектрычная станцыя ў Мазырскім раёне магутнасцю 2,5 МВт. Забеспячэнне насельніцтва цвёрдымі відамі паліва ажыццяўляецца пераважна арганізацыямі жыллёва-камунальнай гаспадаркі, а таксама камунальнымі унітарнымі прадпрыемствамі "Мазырпаліва", "Рэчыцкі гаррайтопзбыт" і "Рагачаўпаліва". У ААТ "Светлагорскі ЦКК" і Добрушскай папяровай фабрыцы "Герой працы" ў 2020-2021 гадах уведзены ў строй міні-ЦЭЦ, якія працуюць на мясцовых відах паліва, сумарнай электрычнай магутнасцю 85 МВт.
